దేశంలో ఎక్కడ చూసినా మనుష్యులకన్నా ఇవి ఎక్కువగా కనపడుతున్నాయి ప్రస్తుతం.పిల్ల పెద్దమనిషి అవ్వడం దగ్గరనుంచీ పితృకర్మల వరకూ ఇలా ప్రతీ విషయానికీ ఫ్లెక్ లు పెట్టెయ్యడం అవసరమా? అని అనిపిస్తుంది ఒక్కోసారి వీటిని ఎక్కడపడితే అక్కడ చూసినప్పుడల్లా... వీటివల్ల " ఫీలింగ్స్ ని నిజంగా ఫీల్ అయ్యి ఆనందపడడం మానేసి వాటిని నలుగురిముందూ ప్రకటించి సంతృప్తి పడే ఓ మానసిక బలహీనత ఎక్కువ అవుతోందేమో మనుష్యులలో " అని అనిపిస్తూ ఉంటుంది ఒక్కసారి.ఆ ఆ ఫ్లెక్స్ లను చూసేవాళ్ళకీ ఇక ప్రతీ విషయం ఓ క్యాజువల్గా భావించే ప్రవర్తన కూడా ఏర్పడుతోందేమో....!!!
ఎవడైనా మనిషి చనిపోతే వాడి ఇంటి దగ్గర " అశ్రునివాళి " అనే ఫ్లెక్స్ పెడితే అర్ధముంది కానీ ఊర్లో ఎక్కడపడితే అక్కడ,,ఎవరు పడితే వాళ్ళు " శోకతప్త నయనాలతో" అని ఫ్లెక్స్లు పెట్టడంలో అర్ధం ఏమిటి? " తప్తము " అంటే అర్ధం తెలియని వాళ్ళు కూడా ఇలా ఊర్లో ఎక్కడపడితే అక్కడ తమ ఫీలింగ్స్ ని " ప్రకటించెయ్యడం " అవసరమా ? ఆలోచించండి...
మొన్నామధ్య బస్లో వెళ్తూంటే ఓ ఊర్లో ఎక్కడ చూసినా ఓ అమ్మాయి ఫొటో కనిపిస్తోంది..ఎవర్రా బాబు ఈ అమ్మాయి?ఈ ఊర్లో అందాలపోటీ పెడితే ఈమెకానీ కొంపతీసి ఫస్ట్ రాలేదు కదా? అని బాధపడుతు కింద వివరం చూస్తే ఓ వార్డ్ మెంబర్ అని రాసుంది...ఓ వార్డ్ మెంబరే ఇన్ని ఫ్లెక్స్ లు పెట్టుకుని ఉంటే మరి ఊర్లో ఎన్ని వార్డ్లు ఉంటాయి?? ఆ ఆ వార్డ్ మెంబర్ల పేరిట ఇంకెన్ని ఫ్లెక్స్ లు నిండి ఉన్నాయో ఊరంతా? మీరే ఆలోచించండి..అదికాక మళ్ళీ ఎం.ఎల్.ఏ గారికి శుభాకాంక్షలు అని,,ఎం.పీ గారికి అభినందనలని ప్రకటించే ఈ రాజకీయనాయకుల తోకగాళ్ళు ఇంకెన్ని ఫ్లెక్స్ లు పెడ్తున్నారో ఆలోచించండి...ఫ్లెక్స్ లు తయారు చేసే వాళ్ళకి లాభం తప్ప ఇంకెవరికి లాభం వీటివల్ల??
ఇక మన యువతరం...తమ అభిమాన నటుడి కొత్త సినిమా రిలీజ్ అవుతోందంటే చాలు...ఇక ఆ ధియేటర్ ఎక్కడుందో కూడా తెలియనంతగా వెర్రిగా కాగితాలు,,కటవుట్లూ ఏర్పాటుచేసేస్తారు...
" ఏమిట్రా ఉపయోగం ఇలా ఆ రోజు ధియేటర్ దగ్గర నీ ఫొటో ఎక్కడో చిన్నగా ఆ ఫ్లెక్స్ చివర్న వేసుకుని ఆ సినిమా విజయవంతం కావలని కోరుకుంటున్నాను అని ఏర్పాటు చెయ్యడం వల్ల నీకు?నీ అభిమాన హీరో కూడా నువ్వు తనకోసం అలా పెట్టావని గుర్తించడు కదా? మరెందుకురా అంత వందలూ వేలూ ఖర్చు చెయ్యడం ఆ మాత్రందానికి? అంటే " మరి ఫాన్స్ అయ్యి ఆ మాత్రం చెయ్యకపోతే ఎలారా? " అన్నాడు నా పరిచయస్తుడొకడు నాతో... " అభిమానం ఉంటే ఆ వ్యక్తిని ఆదర్శంగా తీసుకుని జీవితంలో మనమెలా పైకి రావాలని ఆలోచించాలి కానీ ఈ అర్ధంలేని పనులేమిట్రా? " అందామని అనుకున్నాను కానీ వాడికి అది ఆనందమిస్తుంటే కాదనడానికి నేనెవడిని? అని ఇంకేం అనలేదు...
" ఎటువంటి గుర్తింపూ తెచ్చుకోని వాళ్ళు తమ ఆత్మనూన్యతా భావాన్ని కప్పిపుచ్చుకోడానికీ,తాము గొప్పవారిమనే ఆధీక్యతాభావాన్ని నలుగురుముందు చాటుకోడానికీ,,మొత్తానికేదో విధంగా ఈ రకంగానైనా జనాలలో గుర్తింపుపొందాలని అనుకునే వాళ్ళే ఈ రకమైన పనులు చేస్తారు " అని అంటుంది సైకాలజి.
" ఐడెంటిటీ క్రైసిస్ "గల వ్యక్తులు ఇంతమందికి ఉన్నారా ఈ సమాజంలో? అని అనిపిస్తుంది మొత్తం మీద ఇన్ని ఫ్లెక్స్ లను చూస్తే,,
మీరేమంటారు దీని గురించి?
- Kiran
కామెంట్‌లు లేవు:
కామెంట్‌ను పోస్ట్ చేయండి